Psalms 119

law = ren (voice)

testimony = hitleinien (tell out)

ordinances/judgements = hakot (judgement/boundary)

commandments = mengkatien (command)

statutes = rendemien koa ling kati (thoughts which he establishes/puts strong)

precepts = hihiseien (teachings)

word = selusien (talk)

promise = hatkatien (promise/plan)

Hetetamenien ten Selusien Votut onen Ahi

1Tokolkatien hel en koakeil ualien one mutolas,
koa moulien one musil kat ren Iahova.
2Tokolkatien hel en koakeil amum usil rendemien koa Ahi ling kati
ka along kati ral min moulien vasi one.
3Armumontei tounah vatisa,
ka amusil sise koa kei lingi.
4Ahi, keik kosan hihiseien keil
koa emvati mevalong kati.
5O tahos munak nirkur tontei mun sise keil koa keik koling kati,
ka nilong kat rendemien keil onom.
6Sakini, nirmemoutei mun
veni namundem usil mengkatien keil onom.
7Inau nimasmasuk hetal moulien koa mal
navong nakilea revi en hakot keil koa komumoni.
8Rendemien vasi keil koa koling kati, inau nusili,
sakini konalokoveintei nau li.

___________

9?Ehon hau ka atouli hau keil iting koe moulien one hetolas hemukave?
Ile kokoe eni hetal min selusien keil onom.
10Inau nusiluk en moulien vasi keil onak,
konamaentei nau nenaha ran mengkatien keil onom.
11Inau naling suain selusien onom neim en tinok,
hesakini nirmottei en tisaen heha katuk.
12O Iahova, namasmasuk.
Kihiseinau en rendemien keil onom koa koling kati.
13Inau navit lein hakot keil
koa keik kosani min komai.
14Nasi nau keke mousil mengkatien keil onom
lohlin munak nakur tounah keil koa mane teni mariso.
15Hihiseien keil onom mules en rendemien onak keke nindem kilea aneite ten keil,
ka namundem usil sise keil koa kolingi ven komai.
16Nasi nau ven mengkatien keil onom,
ka nirlokoveintei sakien ten hulien ten selusien onom.

___________

17Kumoni hetahos minau koa navi meatin toumien onom,
ka inau nito ka nilong kat rem.
18Sehen metok keke maleilei revi
en more tounah keil koa amul en selusien keil onom.
19Inau naro en out netan suval heou tai,
sakini konaling suaintei mengkatien keil onom ranau.
20En tinok, en avong vasi,
ekvati mok keke nilea revi en hakot keil onom.
21Keik kosel kat koakeil avut keil,
ka mahien onom hel en koakeil uvaha ran mengkatien keil onom.
22Koakeil enek amundemaenau ka armundeitei inau,
kiting koe nau ran keil veni inau namusil kat rendemien keil koa koling kati.
23Avaseini hetetamen keil aro vituai keke avaselus usil sise koa avapurunau eni,
inau koa navi meatin toumien onom nindem usil mengkatien keil onom keke nilea aneite ten keil.
24Inau nasi nau houlu mok ven hihiseien keil onom,
veni keil amul arie sise minau keke mousili.

___________

25Nalonge tisa houlu ka namatil enges en atan,
kitali lat nau hesuval koviteni en selusien onom.
26Navitehiten tounah vasi koa namumoni minuk ka kovit kes selusien minau,
kihiseinau en mengkatien keil onom.
27Kumonau nilea en hihiseien keil onom
ka nindem usil marmari umen keil onom keke nilea en aneite ten keil.
28Nalonge tisa houlu ka tinok mul mis,
kisan ris keihoen minau hesuval koviteni en selusien onom.
29Kiting koe nau nanahatei en sise koa romaltei,
en tahosien onom, kihiseinau en mengkatien keil onom.
30Inau namusil sise ten longkatien,
sakien keil koa kolingi, lisenges namundemi keke nusil keil hemukave.
31O Iahova, inau namusil hihiseien keil onom,
konamaentei nau analehau enau en meten meatin keil.
32Navong nalong rem, nakalah namum musili,
veni komul kasan ris ileilien minau.

___________

33O Iahova, kihiseinau mousil mengkatien keil onom,
ka nilong kat keil lisenges.
34San ileilien minau ka nusil kat rendemien keil koa koling kati.
Anatin, nilong kati hetal min moulien vasi onak.
35Kilamunau en sise ten mengkatien keil onom,
veni en out enek navotin sien.
36Kihiles moulien onak keke nusil kat hihiseien keil onom,
ka nirmusiltei sakien ten metenan.
37Kihiles metok ran tounah keil avi heisav enges,
kiting koe moulien onak hesuval koa kovat kati.
38Hatkatien koa komumoni min meatin toumien onom ka meatin keil emun koa avouhou minuk,
kumoni hekistal hehi anatin.
39‘Kututnau li ran selkututien keil koa nametauni keke vativieh keil onak anoumoni minau’,
veni mengkatien keil onom atahos.
40Ekvati li mok hihiseien keil onom.
Veni komal imok, kisan ris moulien minau.

___________

41 105do 130do 160do 165do 176do